Хуудасны тоо: 94
ХУРААНГУЙ
Аж үйлдвэрлэлийн 4-р хувьсгалын нөлөөгөөр ажлыг автоматжуулах, хиймэл оюун ухаан роботын хэрэглээ өсч байгаа нь ажил эрхлэхэд шаардагдах ур чадваруудыг өөрчлөхөөс гадна эдийн засгийн салбаруудын хувьд томоохон сорилт болж байна. Иймээс даатгалын зуучлалын салбарт хөндөгдөж буй хүний нөөцийн ялангуяа ур чадварын асуудал түүнийг үнэлэн тухайн салбартаа тодорхой хэмжээний хувь нэмэр оруулах үүднээс даатгалын зуучлагчийн ур чадварын өнөөгийн байдлыг судлан, ур чадварын түвшинг  үнэлэхийг зорилоо.  Бид Олон улсын даатгалын итгэмжлэгдсэн институтээс (CII) гаргасан CORE түвшний 48 мэдлэг, ур чадварын хүрээнд өөрийн орны даатгалын салбарт ажиллаж буй даатгалын зуучлагчдын ур чадварын өнөөгийн байдлыг тодорхойлох зорилгоор судалгаа авсан. Судалгааг google forms ашиглан онлайн хэлбэрээр авсан ба судалгаанд нийт 116 хүн оролцсон. Асуулга судалгааны үр дүнг SPSS -24 програм ашиглан боловсруулав. Даатгалын зуучлагчдаар өөрсдийнх ур чадварыг 1-5 шкалаар үнэлүүлэн судалгааны үр дүнд статистик шинжилгээ хийж даатгалын зуучлагчийн ерөнхий ур чадварт нөлөөлөх ач холбогдол бүхий үзүүлэлтүүдийг тодорхойллоо.. Кронбах Альфа 0.996 байгаа нь шкал үнэлгээний найдвартай байдал сайн байгааг харуулж байна. 
Бид судалгаандаа даатгалын зуучлагчийн ур чадваруудыг нэгтгэн нийт 6 төрлийн хувьсагч үүсгэсэн ба хувьсагчуудын хоорондын корреляцийн коэффициентыг тооцоолсон. Корреляцийн шинжилгээний үр дүнг харвал ерөнхий ур чадвар нь бусад бүлгийн ур чадваруудтай 83%-88%-ийн  хамааралтай байв. Фактор шинжилгээг хийхэд бүлэг бүрийн КМО утгууд ач холбогдолтой бөгөөд хүчин зүйлүүд нэг үндсэн бүрдэл болж байна. Мөн детерминацийн коэффициент 0.837 байгаа нь энэхүү загварын хувьсагчид  зуучлагчийн ерөнхий ур чадварыг 83.7%-иар тайлбарлаж байв. Мөн үнэлгээний ANOVA үзүүлэлтээс харахад бүх хүчин зүйлс хамтдаа ач холбогдолтой болохыг F статистикийн утга харуулж байна. Олон хүчин зүйлийн регрессийн шинжилгээгээр даатгалын зуучлагчдын ерөнхий ур чадварт туршлага, даатгалын зуучлагчийн үүрэг, хариуцлага, даатгалын үйл ажиллагаа  гэсэн 3 хувьсагч нөлөөтэй буюу статистикийн ач холбогдолтой үнэлэгдлээ.